ᒪᐃᔭ ᒫᑦᓕᓐ ᕆᐊᑦᕘᕐᓐ

ᑐᖕᖓᓱᒋᑦᓯ ᐃᖃᓗᓐᓂ, ᓄᓇᕘᑉ ᐊᖏᔪᖅᑳᖃᕐᕕᖓ, ᐃᓄᖏᑦ 8,000-ᒦᑦᑐᑎᒃ, ᐋᑐᕚᒥᑦ ᐅᐊᓐᓇᒧᑦ ᐅᐊᓯᓐᓂᖃᖅᑐᖅ 2,000 ᑭᓛᒥᑕᐃᑦ ᐅᖓᑖᓃᕌᔾᔪᑦᑐᒥ, ᑲᓇᑕᐅᑉ ᐊᖏᔪᖅᑳᖃᕐᕕᖓᓂᑦ.

ᓄᓇᓕᐸᐅᔭᕗᑦ ᐱᔨᑦᓯᕋᕈᑎᖃᑦᓯᐊᖅᑐᖅ ᖃᐅᑕᒫᑦ ᒪᕐᕉᓐᓄᑦ ᖃᖓᑕᓲᐸᐅᔮᓐᓄᑦ ᑎᑭᑕᐅᕙᑦᑐᑕ ᐋᑐᕚᒥᑦ, ᐊᒻᒪ ᐃᑲᕐᕋᓄᑦ ᐱᖓᓱᓄᑦ ᐃᖏᕐᕋᓇᖅᑐᓂ.  ᒪᓐᑐᕆᐊᒥᑦ ᐊᒻᒪ ᔨᐊᓗᓇᐃᒥᑦ ᖃᖓᑕᓲᖃᖅᐸᒻᒥᔪᒍᑦ ᐱᖓᓱᐊᖅᑎᖅᑐᑕ ᐱᓇᓱᐊᕈᓯᐅᑉ ᐃᓗᐊᓂ.  ᐃᖃᓗᓐᓂ ᖃᖓᑕᓲᒃᑯᕕᒃ ᑲᓇᑕᒥ ᐅᐸᑦᑕᐅᓛᖑᖃᑕᐅᕙᑦᑐᖅ ᐊᕙᑎᓂ ᐅᐸᑦᑕᐅᓛᖑᕙᑦᑐᓂᑦᑕᐅᖅ.  ᓱᓕᔪᒥᑦ ᐅᑭᐅᖅᑕᖅᑐᒧᑦ ᐃᓯᕐᕕᓪᓚᕆᐅᔪᖅ ᓄᓇᕘᒧᑦ ᐊᒻᒪ ᐅᑭᐅᖅᑕᖅᑐᒧᑦ, ᐊᒻᒪᑦᑕᐅᖅ ᓇᑭᑐᐃᓐᓈᐸᑦᑐᓄᑦ ᓄᓇᕐᔪᐊᕐᒥᑦ ᐃᖃᓗᓐᓄᑦ ᐅᕐᓴᕐᕕᐅᒋᐊᖅᑐᐸᒻᒥᔪᖅ.

ᐊᒥᓱᐊᓗᓐᓂᑦ ᑐᖕᖓᓱᑦᑎᑦᓯᕙᑦᑐᒍᑦ ᓂᐅᕐᕈᕙᑦᑐᓂᑦ ᓇᑭᑐᐃᓐᓈᖅᑐᓂᑦ ᐅᐊᓐᓇᒦᖔᖅᑐᓂᑦ ᐊᒻᒪ ᓂᒋᕐᒦᖔᐸᑦᑐᓂᑦ ᐊᕐᕌᒎᑉ ᐃᓗᐊᓂ ᖃᖓᑐᐃᓐᓇᒃᑯᑦ, ᐳᓚᕋᑦᑎᓂᓪᓗ ᓂᐅᕐᕈᔨᓂᑦ, ᐃᓚᓐᓈᕆᔭᓂᑦ ᐅᕝᕙᓘᓐᓃᑦ ᐱᖃᓐᓂᕆᔭᓂᑦ ᓂᐅᕐᕈᕙᑦᑐᓂᑦ, ᐋᓐᓂᐊᕕᓕᐊᖅᑐᓂᑦ, ᐊᒻᒪᑦᑕᐅᖅ ᑲᓇᑕᒥᐅᑕᓂᑦ ᐊᒻᒪ ᓄᓇᕐᔪᐊᕐᒥᐅᑕᓂᑦ ᓯᕗᓕᖅᑎᓂᑦ ᑲᑐᔾᔨᖃᑎᒌᓄᑦ ᓄᓇᓕᓐᓄᑦ.

ᐃᖃᓗᐃᑦ ᓄᓇᕘᒧᑦ ᒪᓕᒐᓕᐅᕐᕕᑦᑕᖃᖅᑐᖅ, ᑐᖕᖓᕕᐅᔪᓂᑦ ᐊᒥᓱᐊᓗᓐᓄᑦ ᐃᖅᑲᓇᐃᔭᕐᕕᓐᓄᑦ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᑲᑐᔾᔨᖃᑎᒌᓃ, ᐊᒻᒪᑦᑕᐅᖅ ᐊᒥᓱᑲᓪᓚᓐᓄᑦ ᐃᓄᓐᓄᑦ ᑲᑐᔾᔨᖃᑎᒌᓄᑦ, ᑎᒥᖁᑎᓄᑦ ᐊᒻᒪ ᓇᒻᒥᓂᖃᖅᑎᓄᑦ ᐱᔨᑦᓯᕋᖅᐸᑦᑐᓂᑦ ᑕᐃᒃᑯᓂᖓ ᑲᑐᔾᔨᖃᑎᒌᒻᒪᕆᐅᔪᓂᑦ ᐃᖃᓗᓐᓃᑦᑐᓂᑦ.

ᐃᖃᓗᐃᑦ ᐃᓕᖅᑯᓯᓕᕆᓂᒃᑯᑦ ᑐᖕᖓᕕᐅᕙᒻᒥᔪᖅ ᑲᓇᑕᒥ ᐅᑭᐅᖅᑕᖅᑐᒥ ᑲᓇᓐᓇᕐᒥᐅᑕᓄᑦ ᐃᓄᓐᓄᑦ, ᐊᒻᒪ ᐊᓂᕐᕋᕆᔭᐅᓗᓂ ᐊᒥᓱᓄᑦ ᐃᓅᖏᑦᑐᓄᑦ ᓇᑭᑐᐃᓐᓈᕐᓯᒪᔪᓄᑦ ᓄᓇᕐᔪᐊᕐᒥᑦ.  ᓄᓇᓕᐸᐅᔭᒃᑯᑦ ᖁᔭᒋᔭᖃᖅᐸᑦᑐᑦ ᓇᓗᓇᐃᖅᑕᐅᓯᒪᕙᓐᓂᖏᓐᓂᑦ ᐃᓄᐃᑦ ᐃᓕᖅᑯᓯᖏᑦ ᓄᓇᓕᐅᑉ ᐃᓗᐊᓂ ᓇᒥᑐᐃᓐᓇᖅ, ᐱᓗᐊᖅᑐᒥ ᑎᑎᕋᕐᓯᒪᕙᑦᑐᒃᑯᑦ ᖃᓄᑐᐃᓐᓇᖅ ᐊᒻᒪ ᓴᓇᐅᒐᒃᑯᑦ.  ᓄᓇᓕᐸᐅᔭᕗᑦ ᐱᕚᓪᓕᕈᑎᖃᑦᓯᐊᕐᓯᒪᒻᒥᔪᑦ ᓄᓇᓕᓐᓄᑦ ᐃᖅᑲᓇᐃᔭᖅᑎᒻᒪᕆᓐᓂᑦ ᐃᖅᑲᓇᐃᔭᕆᐊᕐᕕᐅᕙᓐᓂᖓᓂᑦ ᐱᔨᑦᓯᕋᕆᐊᕐᑐᖅᓯᒪᔪᓂᑦ ᓄᓇᓕᓐᓂᒥᐅᑕᓂᑦ ᐊᒻᒪ ᓄᓇᕘᒥᐅᑕᓂᑦ ᓄᓇᓕᓐᓂ.

ᖁᕕᐊᓇᖅᑐᒻᒪᕆᐅᓕᕐᒪᑦ ᐃᖃᓗᓐᓄᑦ, ᐊᒻᒪ ᐱᓕᕆᔪᒻᒪᕆᐅᓕᖅᑐᑕ ᓄᓇᓕᐸᐅᔭᓕᐅᕋᓱᑦᑐᑕ ᑕᑯᒥᓇᖅᑐᐊᕕᒻᒥᑦ, ᐱᓕᕆᕝᕕᐅᑦᓯᐊᖅᑐᒥᑦ ᐊᒻᒪ ᒪᑭᒪᒍᓐᓇᓯᐊᖅᑐᒥᑦ.  ᐃᓅᓯᖃᕐᕕᓴᑦᓯᐊᖑᔪᒥᑦ ᓄᓇᓕᖃᕋᓱᑦᑐᒍᑦ ᐱᑕᓕᒻᒥᑦ, ᐋᕼᐊᑕᑰ ᐅᐱᓐᓇᕋᓂ, ᐋᖅᑭᑦᓱᐃᔾᔪᑎᖃᖅᑐᒥᑦ ᑮᓇᐅᔭᓕᕆᓂᒃᑯᑦ ᐃᑉᐱᒍᓱᑦᓯᐊᓂᕐᒥᑦ.

ᐃᖃᓗᓐᓂᒥᐅᑕᐃᑦ ᐅᐱᒍᓲᑎᖃᑦᓯᐊᖅᐳᑦ ᓄᓇᓕᒻᒥᓂᒃ ᐊᒻᒪ ᐱᐅᔪᒃᑯᑦ ᑐᕌᒐᖃᖅᐸᓪᓕᐊᓕᖅᑐᑕ ᑕᑯᒥᓇᕐᓂᕐᓴᐅᔾᔪᑎᓄᑦ, ᑐᓪᓕᓂᓕᐅᖅᐸᓪᓕᐊᓪᓗᑕ, ᐊᒻᒪ ᓯᔾᔭᖃᕐᓗᑕ ᐅᓗᕆᐊᓇᖏᑦᑐᒥᑦ, ᐅᐸᒐᑦᓴᐅᓯᐊᖅᑐᒥᑦ ᐊᒻᒪ ᑕᐅᓄᖓᐸᑦᑐᑦ ᑲᔮᕈᓱᒍᓐᓇᑦᓯᐊᕐᓗᑎᒃ ᑕᓯᐅᔭᕐᔪᐊᕐᒥᑦ ᑕᑯᒥᓇᕐᓂᖓᓂᑦ, ᐅᑭᐅᖑᒐᓗᐊᖅᐸᑦ ᐊᐅᔭᐅᒐᓗᐊᖅᐸᓘᓐᓃᑦ.  ᑐᑭᓯᒃᑲᓐᓂᕈᓐᓇᖅᑐᒥ ᐅᕙᑦᓯᐊᕈᓂᒃ ᐊᑐᓕᖅᑕᑎᓐᓂᑦ ᐊᒻᒪ ᕿᒥᕐᕈᐊᕐᓗᒋᑦ ᐃᓕᖅᑯᓯᑦᑎᓐᓄᑦ ᐊᑦᑐᐊᔪᑦ ᐳᓚᕋᑦᑐᓕᕆᔨᒃᑯᓐᓂ, ᓱᓇᒃᑯᑖᒃᑯᕕᑦᑎᓐᓂ ᐊᒻᒪ ᒪᓕᒐᓕᐅᕐᕕᑎᓐᓂ, ᐃᖃᓗᐃᑦ ᐃᓄᒋᐊᕝᕕᖓᓃᑦᑐᐃᓐᓇᐃᑦ.

ᐃᖃᓗᓐᓅᓛᕈᒪᒍᕕᑦ ᖃᖓᑐᐃᓐᓇᒃᑯᑦ, ᓄᓇᑖᕆᔭᖅᑐᓪᓗᒍᓘᓐᓃᑦ ᐅᕝᕙᓘᓐᓃᑦ ᓇᒻᒥᓂᖅᑖᕈᒪᒍᕕᑦ ᑕᒫᓂ, ᐃᑭᐊᖅᑭᕕᕗᑦ ᑐᑭᓯᒋᐊᕐᕕᓴᑦᓯᐊᕙᐅᔪᖅ ᐊᒻᒪ ᓇᓗᓇᐃᔭᐃᑎᖃᖅᑐᓂ ᓄᓇᑦᑎᓐᓂᑦ ᐱᔾᔪᑎᓕᓐᓂᑦ.  ᓄᓇᓕᕗᑦ ᐅᐱᒋᑦᓯᐊᕋᑦᑎᒍ, ᐃᓄᖏᑦ ᐊᒻᒪ ᓱᓇᐅᓂᑦᑎᓐᓂᑦ ᓄᓇᕘᒥ.

ᖁᔭᓐᓇᒦᒃ (Thank you)

ᒪᐃᔭ ᕆᐊᑦᐴᕐᓐ