ᓴᖅᑭᑕᐅᔪᑦ ᔨᒥ ᕿᓚᑉᐸᖅ ᐱᓪᓗᒍ ᓱᕈᓯᕐᓄᑦ ᐱᖕᖑᐊᖅᑐᓕᕆᔨᒃᑯᑎᒍᑦ ᐱᖕᖑᐊᖅᑐᓕᕆᔾᔪᑎᑦᓴᑦ

18/04/2017

ᓴᖅᑭᑕᐅᔪᑦ ᔨᒥ ᕿᓚᑉᐸᖅ ᐱᓪᓗᒍ ᓱᕈᓯᕐᓄᑦ ᐱᖕᖑᐊᖅᑐᓕᕆᔨᒃᑯᑎᒍᑦ ᐱᖕᖑᐊᖅᑐᓕᕆᔾᔪᑎᑦᓴᑦ

ᐃᐳᕈ 18, 2017 (ᐃᖃᓗᐃᑦ, ᓄᓇᕗᑦ) - ᐃᖃᓗᓐᓄᑦ ᒪᐃᔭ ᒫᑕᓕᓐ ᕆᐊᑦᕘᕐᓐ ᖁᕕᐊᒋᓪᓗᒍ ᑐᓴᖅᑎᑦᓯᕗᖅ ᓴᖅᑭᑕᐅᓂᖓᓂᑦ ᔨᒥ ᕿᓚᑉᐸᖅ ᐱᓪᓗᒍ ᓱᕈᓯᕐᓄᑦ ᐱᖕᖑᐊᖅᑐᓕᕆᔾᔪᑎᑦᓴᓂᑦ - ᐱᖕᖑᐊᕐᕕᓐᓄᑦ ᐃᓯᕈᑎᒍᑦ ᐃᑲᔫᑎᑦᓴᐃᑦ ᐃᓄᐃᑦ ᓱᕈᓰᑦ ᐊᒻᒪ ᐃᓚᓐᓈᕆᔭᖏᑦ ᐊᑐᕈᓐᓇᖁᓪᓗᒋᑦ ᐳᐃᔾᔪᕋᕐᕕᒻᒥᑦ ᐊᒻᒪ ᐱᓕᕆᐊᑦᓴᖏᓐᓂᑦ.
“ᐃᖅᑲᐅᒪᓪᓗᒍ ᓇᓪᓕᒋᔭᐅᔪᖅ ᒪᐃᔭᐅᓚᐅᕐᓯᒪᔪᖅ ᐊᒻᒪ ᑲᑎᒪᔨᐅᓚᐅᕐᓯᒪᓪᓗᓂ, ᑕᑯᓐᓇᖕᖑᐊᒐᖃᖅᐸᓚᐅᖅᑐᖅ ᐳᐃᔾᔪᕋᕐᕕᖃᖁᓪᓗᒋᑦ ᐃᖃᓗᓐᓂ ᓱᕈᓰᑦ, ᐅᐱᒍᓱᑉᐳᖓ ᓴᖅᑮᔭᕆᐊᑦᓴᖅ ᓄᑖᒥᑦ ᓄᓇᓕᐸᐅᔭᒃᑯᑎᒍᑦ ᐱᓕᕆᐊᑦᓴᓕᐊᖑᔪᒥᑦ,” ᐅᖃᖅᑐᖅ ᒪᐃᔭ ᕆᐊᑦᕘᕐᓐ. “ᔨᒥ ᖁᕕᐊᓱᓪᓚᕆᒃᑲᔭᓕᖅᑐᖅ ᓴᖅᑮᓇᓱᐊᖅᐸᓚᐅᕐᓂᖓᓄᑦ ᐊᔪᐃᓐᓇᖅᑐᓂ, ᐃᓚᓐᓈᕇᑦ ᐃᑲᔪᖅᑕᐅᔭᕆᐊᖃᕐᓂᕐᓴᐅᕙᑦᑐᑦ ᐃᓯᖃᑕᐅᔪᓐᓇᖃᑦᑕᕐᓂᐊᓕᖅᑐᑦ ᐱᖕᖑᐊᕐᕕᑦᓯᐊᕚᓗᒻᒧᑦ.”
ᓴᖅᑭᑕᐅᓂᐊᖁᓪᓗᒍ ᐱᓕᕆᐊᑦᓴᓕᐊᖑᔪᖅ, ᓄᓇᓕᐸᐅᔭᐃᑦ ᐃᖃᓗᐃᑦ ᐃᖅᑲᓇᐃᔭᕐᕕᖏᑦ, ᐊᖅᑯᑎᖃᖅᑐᑎᒃ ᑎᒍᒐᓱᐊᖅᑕᐃᒃᑯᑎᒍᑦ (ᐱᖕᖑᐊᖅᑐᓕᕆᓂᖅ, ᓄᓇᐅᑉ ᐊᕙᑎᐊᓂᑦ ᑲᒪᑦᓯᐊᓂᒃᑯᑦ ᓯᕗᓕᖅᑎᐅᓂᖅ, ᐳᐃᔾᔪᕋᕐᕕᓕᕆᓂᖅ, ᓄᓇᓕᓐᓂᑦ ᐳᕈᐃᕙᓪᓕᐊᓂᖅ (ᐃᓅᓯᖃᑦᓯᐊᖅᑐᓕᕆᓂᕐᒥᑦ) ᐱᓕᕆᐊᑦᓴᒥᑦ, ᐃᑲᔫᑎᖃᓚᐅᖅᑐᑦ $100,000-ᖑᓗᐊᓂᑦ ᐱᓕᕆᔾᔪᑎᑦᓴᐅᓂᐊᖅᑐᓂᑦ ᐱᓕᕆᐊᑦᓴᓕᐊᒥᑦ.
ᐅᓪᓗᒥ ᑐᓴᖅᑎᑦᓯᔾᔪᑎᐅᔪᖅ ᓯᕗᓪᓕᐅᐹᕐᓯᐅᑎᒋᔭᖓ ᐱᓕᕆᐊᑦᓴᓕᐊᑉ, ᐃᑲᔫᑎᖃᖅᑎᑦᓯᕙᓐᓂᐊᖅᑐᑦ ᐃᓚᓐᓈᕇᓂᑦ ᐳᐃᔾᔪᕋᕐᕕᒻᒥᑦ ᐱᓕᕆᐊᑦᓴᓄᓪᓗ ᐃᓚᒋᔭᐅᔪᓐᓇᖃᑦᑕᖁᓪᓗᒋᑦ. ᐱᓕᕆᐊᑦᓴᖅ ᐊᖏᓪᓕᕙᓪᓕᐊᑐᐃᓐᓇᓂᐊᖅᑐᖅ ᐊᓯᖏᓐᓂᑦ ᐱᓕᕆᐊᑦᓴᓂᑦ ᐃᓚᔭᐅᕙᓪᓕᐊᓗᓂ.
ᐱᓕᕆᐊᑦᓴᓕᐊᖑᓯᒪᔪᖅ ᐃᑲᔪᖅᑕᐅᖃᑦᑕᕈᒪᓪᓗᑎᒃ ᑕᐃᒃᑯᐊ ᓱᕈᓰᑦ ᐃᑲᔪᖅᑕᐅᒋᐊᖃᓪᓚᕆᑦᑐᑦ. ᐊᖏᓪᓕᕙᓪᓕᐊᖁᑦᓯᐊᓂᐊᖅᑕᕋᓗᐊᕗᑦ, ᐱᓕᕆᔾᔪᑎᑦᓴᖏᑦ ᐃᓚᕙᓪᓕᐊᓂᖏᑦ ᒪᓕᑉᐸᓪᓗᒋᑦ, ᐃᑲᔪᖅᑕᐅᒋᐊᓕᓕᒫᑦᓯᐊᑦ ᐃᑲᔪᖅᑕᐅᖃᑦᑕᓂᐊᕐᒪᑕ.
ᐃᑲᔫᓯᐊᕋᓱᐊᕈᓐᓇᖅᑐᑦ ᐱᔪᓐᓇᕐᓂᖏᑦ ᐃᓚᓐᓈᕇᑦ ᑐᑦᓯᕋᐅᑎᒥᑦ ᑎᑎᕋᕆᐊᓖᑦ, ᖃᕋᑕᐅᔭᒃᑯᑦ ᐱᔭᑦᓴᐃᑦ ᐅᕝᕙᓘᓐᓃᑦ ᐳᐃᔾᔪᕋᕐᕕᒻᒥᑦ.
ᐱᓕᕆᔾᔪᑎᑦᓴᑦ ᐃᓚᕙᓪᓕᐊᓂᖏᓐᓂᑦ, ᓄᓇᓕᐸᐅᔭᒃᑯᑦ ᕿᓂᖅᐸᓂᐊᕐᒥᔪᑦ ᓇᐅᒃᑯᑦ ᐃᓚᔭᐅᔪᓐᓇᓂᐊᕐᒪᖔᖅ ᐱᓕᕆᐊᑦᓴᓕᐊᖑᓯᒪᔪᖅ ᐃᓚᒋᔭᐅᔪᐃᓐᓇᐅᖃᑦᑕᕐᓂᐊᕐᒪᑕ ᑕᐃᒃᑯᐊ ᐃᓚᓐᓈᕇᑦ ᐃᑲᔪᖅᑕᐅᒋᐊᖃᖅᐸᑦᑐᑦ.
ᑐᓂᕐᕈᑎᖃᕈᒪᓂᐊᖅᑐᑦ ᐱᓕᕆᔾᔪᑎᑦᓴᓂᑦ ᑐᓂᓯᔪᓐᓇᖅᑐᑦ ᐱᖕᖑᐊᖅᑐᓕᕆᔨᒃᑯᑦ ᑐᖕᖓᓱᑦᑎᑦᓯᓂᕐᒥᑦ ᐱᔨᑦᓯᕋᖅᑎᒧᑦ aquaticcentre@city.iqlauit.nu.ca