ᖃᓄᐃᓕᐅᕈᑎᑦᓴᑦ

ᐃᖃᓗᓐᓅᕋᓗᐊᕈᕕᑦ ᐱᓕᕆᔭᖅᑐᕐᓗᑎᑦ ᖁᕕᐊᓱᒋᐊᖅᑐᓪᓗᑎᓪᓘᓐᓃᑦ, ᐃᖃᓗᓐᓂ ᓱᓇᑐᐃᓐᓇᑦᓯᐊᓂᑦ ᑕᑯᔭᑦᓴᓕᒃ ᓂᐅᕐᕈᓐᓂᕈᕕᑦ!

ᐊᓃᕈᒻᒪᐅᒍᕕᑦ - ᐱᐅᒋᓕᓪᓚᕆᓐᓂᐊᖅᑕᐃᑦ ᓄᓇᓕᐸᐅᔭᕗᑦ ᖃᖓᑐᐃᓐᓇᑦᓯᐊᒃᑯᑦ ᐊᕐᕌᒎᑉ ᐃᓗᐊᓂ ᖃᓄᐃᓕᐅᕈᑎᖃᕐᒪᑦ. ᑕᓯᐅᔭᕐᔪᐊᕐᒥ ᑎᑦᑕᐅᕋᓛᑦᑐᒥᑦ ᖃᖓᑕᑎᑦᓯᓗᑎᑦ ᓯᐊᕐᕆᔮᕈᓐᓇᖅᑐᑎᑦ ᐅᑭᐅᒃᑯᑦ, ᐊᒻᒪᓗᑦᑕᐅᖅ ᖃᒧᑕᐅᔭᕋᑦᑐᓄᑦ ᐱᐅᔪᐊᓘᓗᓂ.  ᐅᐱᕐᖓᓵᒃᑯᑦ ᐅᐱᕐᖔᑯᓪᓗ, ᐃᖃᓗᒐᓱᓐᓇᖅᑐᖅ, ᖃᔭᓐᓇᖅᑐᖅ, ᐅᒥᐊᖅᑐᓇᖅᑐᖅ ᐊᒻᒪᓘᓐᓃᑦ ᐃᒫᓃᕋᔭᓐᓇᖅᑐᖅ ᓂᐅᕐᕈᓯᒪᓂᕐᓂᒃ ᐳᐃᒍᐃᓇᖕᖏᑦᑐᓂᑦ. ᓚᐃᓴᖃᐅᑦᓯᐊᖅᑐᖅ ᓂᐅᕐᕈᑎᑦᓯᔨᕗᑦ ᓄᓇᑦᑎᓐᓂ ᐃᓕᓐᓂᑦ ᐃᑲᔪᕈᓐᓇᖅᑐᑦ ᐸᕐᓇᐃᑎᓪᓗᑎᑦ ᖃᓄᐃᓕᐅᕋᑦᓴᓂᑦ ᐅᓪᓗᒃᑯᑦ, ᓄᓇᓕᓐᓂᑦ ᕿᒥᕐᕈᐊᑎᑦᓯᓗᑎᒃ, ᐅᕝᕙᓘᓐᓃᑦ ᓇᒧᑐᐃᓐᓇᖅ ᑐᐱᕐᓯᒪᒍᒪᔪᑦ ᐊᐃᑎᑕᐅᔪᓐᓇᐸᑦᑐᑎᒃ.

ᐃᒻᒥᓂᕐᓱᕈᒪᓂᐊᕈᕕᑦ ᓄᓇᑦᑎᓐᓂ ᕿᒥᕐᕈᐊᕐᓗᑎᑦ, ᐅᑯᐊ ᐅᐸᖁᒥᓇᖅᑐᑦ.

ᓂᐊᖁᓐᖒᑎᑦ

ᖃᐅᔨᒪᔭᐅᔪᖅ ᐃᒫᒃ “ᓂᐊᖁᓐᖒᑎ”, ᓂᐊᖁᓐᖒᑎᑦ ᐃᓚᒋᔭᖓ ᐃᖃᓗᐃᑦ ᐊᒻᒪᓗ ᐅᖓᓯᓐᓂᖃᖅᑐᓂ ᐃᖃᓗᐃᑦ ᕿᑎᐊᓂᑦ 5 ᑭᓛᒥᑕᓂᑦ.  ᓂᐊᖁᓐᖒᑎᓃᑦᑐᓂ ᑕᑯᑦᓴᐅᓂᖏᑦ ᑕᑯᒥᓇᖅᑐᐊᓗᐃᑦ ᐊᕙᑎᐊᓂ ᖃᖅᑲᐅᓗᑎᒃ ᐊᒻᒪᓗ ᐃᒪᕕᒃ. ᓯᔾᔭᖓ ᓂᐊᖁᓐᖒᑎᓂ ᐃᒪᕐᒦᑎᑦᓯᕕᑦᓴᖅ ᐃᓯᒐᖏᓐᓂᑦ ᐃᕝᕕᑦ ᐊᒻᒪᓗ ᐊᔾᔨᓕᐅᖅᑕᐅᓗᓯ ᓵᖓᓂ ᓂᐅᕕᕐᕕᒥᓃᑦ ᕼᐊᑦᓴᓐᐸᐃᒥᓂᒃᑯᑦ.  ᑕᐅᓄᖕᖓᕕᑦᓴᖅ ᑖᑦᓯᒃᑯᑦ ᑭᓯᐊᓂ ᐃᖃᓗᓐᓂ ᐱᓱᕝᕕᑦᓴᖅ ᓯᔾᔭᒃᑯᑦ ᐃᑲᕐᕋᐸᓗᒻᒥᑦ ᐱᓐᓇᔭᓪᓗᓂ ᐊᒻᒪᓗ ᐳᐃᒍᔾᔮᖏᑕᐃᑦ ᒫᓐᓇᒃᑯᑦ ᐊᑐᕈᕕᐅᒃ.

ᒪᓕᒐᓕᐅᕐᕕᒃ

ᐊᖏᕐᕋᕆᔭᖅ ᓄᓇᕘᑉ ᒐᕙᒪᒃᑯᖏᓐᓄᑦ, ᒪᓕᒐᓕᐅᕐᕕᖓ ᓄᓇᕘᑉ ᐃᓗᓕᓕᒃ ᐱᐅᔪᐊᓗᒻᒥᑦ ᑲᑎᒪᕕᒻᒥᒃ ᐱᑕᖃᐅᖅᑐᒥᑦ ᐃᓕᖅᑯᓯᕐᓄᑦ ᐊᑕᔪᓂᑦ ᓲᕐᓗ ᓇᑦᑎᕋᔭᓂᑦ ᓱᓇᒃᑯᑖᖃᐅᖅᑐᑦ ᒫᓐᓇᓂᓴᕐᓄᑦ ᐊᑕᓪᓗᑎᒃ. ᑕᑯᒐᓱᓛᖅᑲᓯ ᐊᔾᔨᐅᖏᑦᑐᑦ ᑕᑯᑦᓴᐅᑎᑕᕗᑦ ᖃᓄᖅ ᐅᐱᒍᓲᑎᒋᒻᒪᖔᑎᒍ ᐃᓄᑦᑎᒍᑦ ᐃᓕᖅᑯᓯᑐᖃᕗᑦ, ᐊᒻᒪᓗ ᒪᑐᐃᑦ ᓯᓂᖏᑦ ᖃᒧᑎᓐᓄᑦ ᓯᐊᕐᕆᔭᐅᑎᐅᔮᖅᑐᑎᒃ ᐊᒻᒪᓗ ᐃᒡᓗᕕᒐᐃᑦ ᐃᓗᐊᓃᑦᑑᔮᖅᑐᓂᑦ ᓴᓇᓯᒪᔪᑦ.

ᓄᓇᑦᑕ ᓱᓇᒃᑯᑖᖏᓐᓂᑦ ᑕᑯᔭᒐᖃᕐᕕᒃ

ᑕᑯᔭᒐᖃᕐᕕᒃ ᕼᐊᑦᓴᓐᐸᐃᒃᑯᑦ ᓂᐅᕕᕐᕕᖁᑎᒥᓂᖓᓃᑦᑐᑦ ᐊᒻᒪᓗ ᑕᑯᑦᓴᐅᑎᑦᓯᕙᑦᑐᑎᒃ ᐃᓄᓐᓄᑦ ᓴᓇᕐᕈᑎᒥᓂᕐᓂᒃ, ᐊᓐᓄᕌᒥᓂᕐᓂᒃ ᐊᒻᒪᓗ ᐱᖁᑎᒥᓂᖏᓐᓂᑦ ᐊᒻᒪᓗ ᑕᑯᑦᓴᐅᕙᑦᑐᑦ ᑕᑯᔭᒐᖃᕐᕕᒻᒥ ᓴᓇᖕᖑᐊᒐᐃᑦ.  ᑎᑎᖅᑲᒐᑦ ᑕᑯᑦᓴᐅᕙᑦᑐᑦ ᑕᑯᔭᒐᖃᕐᕕᒻᒥ ᐊᓯᔾᔨᑕᖅᐸᒻᒪᑕ ᑕᑯᒋᐊᖃᑦᑕᕐᓯᐅᒃ ᐅᐸᒐᐃᒍᑦᓯᐅᒃ.  ᑕᑯᔭᒐᑦᓴᓂᑦ ᓂᐅᕕᐊᑦᓴᓂᑦ ᐱᑕᖃᖅᐸᒻᒥᔪᖅ ᐊᔾᔨᐅᖏᑦᑐᓂᑦ ᓴᓇᖕᖑᐊᒐᕐᓂᑦ, ᐊᓐᓄᕌᓂᑦ ᐊᒻᒪᓗ ᓇᒡᒍᐊᕐᓯᐅᑎᓂᑦ, ᓯᐅᒥᐅᑕᓂᑦ ᐊᒻᒪᓗ ᐅᔭᒥᓂᒃ.  ᐱᕕᖃᕐᓂᕈᑦᓯ, ᑕᑯᒋᐊᕐᓯᐅᒃ ᐊᔾᔨᓕᐊᖑᕙᑦᑐᒥᓃᑦ ᐅᕙᑦᓯᐊᕈᒃᑲᓐᓂᖅ ᐃᖃᓗᓐᓂ.

ᐅᓂᒃᑳᕐᕕᒃ ᑐᑭᓯᒋᐊᕐᕕᒃ

ᐃᓯᑐᐊᕈᕕᑦ ᐅᓂᒃᑳᕐᕕᒻᒧᑦ, ᑕᑯᖅᑳᕐᓂᐊᖅᑕᐃᑦ ᐱᐅᔪᐊᓗᒃ ᓴᓇᖕᖑᐊᒐᖅ ᕿᓚᐅᔾᔭᖑᐊᖅᑐᖅ ᐃᓯᕐᕕᖓᑕ ᕿᑎᓪᓗᐊᖓᓃᑦᑐᖅ.  ᑖᓐᓇᓕ ᓯᕗᓪᓕᖅᐹᖑᓗᓂ ᐅᐸᒐᔭᓐᖑᐊᖅᑕᓯ ᐸᕐᓇᐃᒋᐊᖅᑐᕐᓗᓯ ᓂᐅᕐᕈᑎᑦᓯᔨᓄᑦ ᓇᒧᖕᖓᖃᑕᐅᔪᒪᓂᐊᕈᑦᓯ ᕿᒧᑦᓯᒃᑯᑦ, ᐅᒥᐊᒃᑯᑦ ᐊᒻᒪᓗ ᐊᓯᐊᒍᑦ ᖃᓄᐃᓕᐅᕈᑎᓄᑦ.  ᐊᑐᖅᑐᐊᕐᕕᑦᓴᐅᒻᒥᔪᖅ ᓂᐱᓕᐅᕈᑎᓂᑦ ᐱᓱᓪᓗᓯ ᓈᓚᒐᑦᓴᓂᑦ ᐊᒻᒪᓗ ᐅᐱᕐᖔᒃᑯᑦ, ᐸᐃᓯᑰᓂᒃ ᐊᑐᓚᐅᖅᐸᒻᒥᔪᓄᑦ.  ᑕᑯᔭᒐᖅᑖᕈᒪᒍᑦᓯ, ᐸᐃᑉᐹᒥᑦ ᐱᔪᒪᔪᓐᓇᖅᑐᓯ “ᐅᐊᖕᓇᖓᓂ 60 ᓂᐅᕐᕈᔨ” ᐃᒪᐃᓕᖓᔪᒥᑦ ᐃᖃᓗᐃᑦ ᐊᓯᐊᓂ ᐊᑐᐃᓐᓇᐅᖏᑦᑐᒥᑦ ᐊᖏᕐᕋᕈᑦᓯ ᑕᑯᑦᓴᐅᑎᑦᓯᔪᓐᓇᑕᑦᓯᓐᓂᑦ ᐅᐱᒋᓗᒍ.

ᑕᓯᓗᓕᐊᕆᐊᖅ

ᓄᓇᓕᐸᐅᔭᐃᑦ ᓇᒥᑐᐃᓐᓇᖅ ᐱᐅᒋᔭᒥᑦ ᑭᒃᑯᑐᐃᓐᓇᑦᓯᐊᓄᑦ ᐱᑕᖃᓲᖑᒻᒪᑕ - ᐊᒻᒪᓗ ᐃᖃᓗᓐᓂ ᑕᓯᓗᓕᐊᕆᐊᖑᔪᖅ. ᓇᓗᓇᐃᒃᑯᑎᐅᑉ ᑎᑎᕋᕐᓯᒪᔫᑉ ᐊᑖᓂ ᐊᔾᔨᓕᐅᖅᑕᐅᒍᒪᒐᔪᑦᑐᑦ ᓂᐅᕐᕈᓯᒪᔪᑦ ᐃᖃᓗᓐᓄᑦ. ᑕᓯᓗᓕᐊᕆᐊᖅ ᐊᑐᕈᒪᒍᕕᐅᒃ, ᓄᓇᒥ ᐱᓱᕋᔭᕝᕕᒋᔪᓐᓇᖅᑕᐃᑦ ᑲᔾᔭᐅᓴᕐᓗᑎᑦ ᐅᕝᕙᓘᓐᓃᑦ  ᐱᓱᕋᔭᕝᕕᒋᔪᓐᓇᖅᑕᐃᑦ ᖃᖓᑐᐃᓐᓇᒃᑯᑦ ᐊᕐᕌᒍᒥ, ᓯᐊᕐᕆᔭᐅᑎᑯᑖᕐᕕᒋᔪᓐᓇᖅᑕᐃᑦ ᐅᑭᐅᒃᑯᑦ ᐅᕝᕙᓘᓐᓃᑦ ᐊᐅᔭᒃᑯᑦ ᓄᓇᒃᑰᔫᕐᕕᒋᔪᓐᓇᖅᑕᐃᑦ.  ᑲᔾᔮᕐᓗᑎᑦ ᐱᓱᕋᔭᒍᓐᓇᖅᑐᑎᑦ ᐊᑐᕆᐊᒃᑯᑦ ᐊᖅᑯᓵᖅᐸᓪᓗᒋᑦ ᑕᓰᑦ, ᖃᖅᑲᐃᑦ ᐊᒻᒪᓗ ᓄᓇᑐᐃᓐᓇᐅᑉ ᐃᓱᐊᓅ, ᐃᓄᖃᖏᓯᐊᖅᑐᒧᑦ!

 

ᖃᓄᐃᓕᐅᕈᑎᑦ

ᑐᓂᖅ ᑕᐃᒥ ᓇᓪᓕᐅᓂᕐᓯᐅᕐᓂᖅ

ᐃᖃᓗᓐᓂ ᓇᓪᓕᐅᓂᕐᓯᐅᕈᑎᖓᑦ ᐅᐱᕐᖓᑦᓵᒥᑦ ᐊᑐᖅᑕᐅᕙᑦᑐᖅ ᐃᐳᕈᒥ. ᑐᓂᖅ ᑕᐃ ᐊᔾᔨᐅᖏᑦᑐᖅ ᑕᑯᑦᓴᐅᑎᑦᓯᔾᔪᑎᐅᕙᑦᑐᖅ ᐊᑐᖅᑕᐅᔪᑐᖃᕐᓂᑦ ᐃᓄᐃᑦ ᐱᖕᖑᐊᕈᓯᖏᓐᓂᑦ ᐊᒻᒪᓗ ᐱᐅᓯᖏᓐᓂᑦ ᓲᕐᓗ ᐃᒡᓗᕕᒐᓕᐅᕐᓂᖅ ᐊᒻᒪᓗ ᓇᑦᑎᒥᑦ ᐱᓚᑦᑎᑕᐅᔪᓐᓇᖅᑐᑦ ᐊᒻᒪᓗ ᓂᔾᔭᐅᓯᔭᖅᑐᓂᑦ, ᓱᓇᑐᐃᓐᓇᕐᓂᒃ ᕿᓂᖅᑎᑕᐅᕙᑦᑐᑦ ᐊᒻᒪᓗ ᓯᑯᒥ ᒎᓪᕝᐸᑦᑐᑎᒃ.

ᐊᓕᐊᓇᐃᑦ ᓴᓇᐅᒐᕐᓂᑦ ᖃᓄᑐᐃᓐᓇᖅ ᓇᓪᓕᐅᓂᕐᓯᐅᕐᓂᖅ

ᐱᐅᓂᖅᐹᖑᔪᖅ ᓂᔾᔭᐅᓯᔭᐅᑎᓂᑦ ᓇᓪᓕᐅᓂᕐᓯᐅᕈᑎᖃᕐᓂᖅ ᐅᐊᖕᓇᖓᓂ 60 ᐊᑐᖅᑕᐅᕙᑦᑐᖅ ᔪᓂ ᐃᓱᐸᓗᐊᓂ ᐊᒻᒪᓗ ᔪᓚᐃᒧᑦ.  ᐅᓪᓗᓂᑦ ᖃᑦᓯᒐᓚᓐᓂᑦ, ᑐᐱᐸᐅᔭᒥᑦ ᓇᑉᐸᐃᓯᒪᕙᑦᑐᑦ ᐃᖃᓗᐃᑦ ᐃᓄᒋᐊᕝᕕᖓᓂ ᓂᐅᕐᕈᓯᒪᔪᑦ ᐊᒻᒪᓗ ᐃᖃᓗᒻᒥᐅᑕᐃᑦ ᑕᑯᕋᓐᓈᕐᕕᐅᕙᑦᑐᒥᑦ ᓂᔾᔭᐅᓯᔭᖅᑎᓂᑦ ᓄᓇᕘᒥᐅᑕᓂᓪᓗ ᐊᒻᒪᓗ ᐃᖃᓗᐃᑦ ᓯᓚᑖᓃᖔᕐᓯᒪᔪᓂᑦ ᓄᓇᕐᔪᐊᕐᒥᑦ ᓇᑭᑐᐃᓐᓇᖅ.  ᓂᔾᔭᐅᓯᔭᕐᓂᖅ, ᑕᑯᕋᓐᓈᕐᓂᖅ ᐱᖕᖑᐊᖅᑐᓂᑦ ᖃᓄᑐᐃᓐᓇᑦᓯᐊᖅ, ᐅᓂᒃᑳᖅᑐᓂᑦ ᐊᒻᒪᓗ ᑎᑎᖅᑐᒐᕐᓂᑦ ᓴᖅᑭᔮᖅᑎᑕᐅᕙᑦᑐᑦ.  ᐊᕐᕌᒎᑉ ᐃᓗᐊᓂ ᖃᖓᑐᐃᓐᓇᒃᑯᑦ, ᐊᓕᐊᓇᐃᓕᕆᔨᒃᑯᑦ ᓂᔾᔭᐅᓯᔭᖅᑎᓂᑦ ᖃᐅᔨᒪᔭᐅᑦᓯᐊᖅᑐᓂᑦ ᓇᒥᑐᐃᓐᓇᖅ ᐃᖃᓗᓐᓅᑎᑦᓯᕙᒻᒥᔪᑦ ᐊᒻᒪᓗ ᐊᔾᔨᐅᖏᑦᑐᓂᑦ ᐱᖕᖑᐊᕈᑎᖃᖅᐸᑦᑐᓂᑦ ᐃᖃᓗᒻᒥᐅᑕᓄᑦ ᑕᑯᓐᓇᖅᑕᐅᕙᑦᑐᓂᑦ ᖁᕕᐊᒋᔭᐅᑦᓯᐊᖅᑐᑎᒃ.

 

ᒥᕐᖑᐃᓯᕐᕕᑦ

ᖃᐅᒫᕐᕕᒃ ᓄᓇᓕᒥᓂᖅ ᒥᕐᖑᐃᓯᕐᕕᒃ

ᐱᐅᔪᐊᓗᒃ ᐅᓪᓗᐃᓐᓈᕋᑦᓴᐅᓗᓂ, ᐊᖏᔫᖕᖏᑦᑐᖅ ᐱᕈᖅᑐᖃᑦᓯᐊᖏᑦᑐᖅ ᕿᑭᖅᑕᓛᖅ ᕿᒥᕐᕈᐊᕐᕕᑦᓴᐅᓗᓂ ᐊᔾᔨᐅᖏᑦᑐᓂᑦ ᐃᑦᑕᕐᓂᓴᕐᓂᑦ ᑐᓂᕐᓄᑦ ᐊᑐᖅᑕᐅᖃᑦᑕᖅᑐᒥᓂᕐᓂᒃ ᑕᑯᑦᓴᐅᑎᑦᓯᔪᓂᑦ ᖃᓄᑎᒋ ᓱᓇᑐᐃᓐᓇᕐᓂᑦ ᐃᓅᔾᔪᑎᖃᕈᓐᓇᓂᕐᒪᖔᑕ.  ᖃᐅᔨᒋᐊᕋᑦᓴᑦ ᓂᐅᕐᕈᑎᑦᓯᔨᐅᕙᑦᑐᑦ ᐱᐅᔪᐊᓗᒻᒨᕈᒪᒍᕕᒃ ᐃᓄᑦᑎᑐᑦ ᐊᑎᖃᖅᑎᑕᐅᔪᒥᑦ ᑐᑭᖃᖅᑐᒥᑦ “ᖃᐅᒪᓲᖅ”.

ᓯᐅᕕᐊ ᒍᕆᓂᐅᓪ ᒥᕐᖑᐃᓯᕐᕕᒃ

ᐃᓗᐊᓃᑦᑐᖅ ᓄᓇᓕᐸᐅᔭᐃᑦ, ᓯᐅᕕᐊ ᒍᕆᓂᐅᓪ (ᑰᒃ) ᐅᐸᑦᑕᐅᒐᔪᑦᑐᖅ ᐃᒐᒋᐊᖅᑐᓄᑦ, ᐱᓱᕋᔮᕆᐊᖅᑐᓄᑦ ᓄᓇᒥ ᐊᒻᒪᓗ ᐃᖃᓪᓕᐊᖅᑐᓄᑦ.  ᐃᓪᓗ ᒥᕐᖑᐃᓯᕐᕕᒻᒦᑦᑐᖅ ᐊᑐᖅᑐᐊᕋᑦᓴᖅ ᐊᒻᒪᓗ ᓯᕋᕕᖃᖅᑐᓂ ᓂᕿᓂᑦ ᐊᒻᒪᓗ ᐃᒐᖃᖅᑐᓂ ᕿᔪᑦᑕᑐᖅᑐᒥᑦ.  ᐃᓗᐊᓃᒋᐊᖅ ᒥᕐᖑᐃᓯᕐᕕᐅᑉ ᐱᑕᖃᐅᖅᑐᖅ ᐃᒐᕕᓐᓂᑦ ᐊᒻᒪᓗ ᓯᕋᕕᓐᓂᑦ ᓂᕿᓂᑦ ᑰᑉ ᓯᓈᓂ ᐊᐅᔭᒃᑯᑦ ᐃᓚᒌᓄᑦ ᐅᐸᑦᑕᐅᒐᔪᑦᑐᒥᑦ.  ᐃᖃᓗᓐᓂᑦ ᐊᐅᓚᕆᐊᖃᖏᑦᑐᑎᑦ ᖃᐅᔨᒪᖕᖏᓪᓗᒍ ᓱᒻᒪᑦ ᐊᑎᖃᕐᒪᖔᖅ “ᑭᓇᐅᓚᐅᕐᒪᑦ ᓯᐅᕕᐊ ᒍᕆᓂᐅᓪ?”.  ᓯᐅᓪᕕᐊ ᒍᕆᓂᐅᓪ ᑰᒻᒥᑦ ᐊᑎᓕᐊᒥᓂᖅ ᒥᐊᓕᒐᕐᒥᐅᒧᑦ ᓱᓇᑕᖃᕐᒪᖔᑕ ᓇᒧᑐᐃᓐᓇᖅ ᖃᐅᔨᒋᐊᖅᑎᐅᕙᑦᑐᒥᓂᕐᒧᑦ ᓵᕐᓪᔅ ᕗᕌᓐᓯᔅ ᕼᐋᓪᒧᑦ 1861-ᖑᑎᓪᓗᒍ. ᕼᐋᓪᑉ ᐊᑦᑎᓚᐅᕐᓯᒪᔭᒥᓂᖓ ᐊᑎᖓᓂᑦ ᐸᓂᐊᑕ ᑮᓇᐅᔭᖃᕐᕕᒋᔭᒥᓂᖓᑕ, ᕼᐊᐃᓐᓇᓕ ᒍᕆᓂᐅᓪ, ᐱᖃᓐᓂᕆᓚᐅᖅᑕᖓ ᐊᕐᓈᑕ ᔭᐃᓐ ᕗᐹᓐᓯᔅ ᑮᓇᐅᔭᖃᖅᑎᑦᓯᓚᐅᖅᑑᑉ ᕿᓂᖅᑕᐅᑎᓪᓗᒍ ᐊᓯᐅᓚᐅᖅᑐᖅ 1845-ᒥ ᖃᐅᔨᒋᐊᖅᑎ ᔮᓐ ᕗᕋᐃᓐᑭᓕᓐ.  ᕼᐋᓪ ᑕᒫᓂ ᑕᒻᒫᕐᓯᒪᔪᒥᓂᖅ 1861-ᖑᑎᓪᓗᒍ ᐊᒻᒪᓗ ᐊᑦᑎᓚᐅᖅᑕᖓ ᑲᖏᖅᑐᖅ ᑰᑉ ᐊᓂᐊᕕᒋᕙᑦᑕᖓ ᐃᓱᒪᒋᓪᓗᓂᐅᒃ ᖃᐅᔨᓴᖅᑎᓂ, ᑰᔭᓯ.